Domekan, abenduak 3, Euskararen Eguna da eta, Altzora Sondikako euskara elkartearekin elkarlanean, Txorierriko Zerbitzuen Mankomunitateak hainbat ekintza antolatu ditu, euskara guztiona dela eta guztiok aldarrikatu eta bultzatu behar dugula adierazteko. Ekintzak astelehenean hasi ziren, eskolako eta institutuko ikasleentzako ikuskizunen eskutik. Asteburuan, bestalde, publiko orokorrarentzako ekintzak izango dira. Gaur arratsaldean, adibidez, bertso-saioa egongo da.
Saioa 19:00etan izango da Sondikako Kultur Etxean, eta oholtza gainean ikusiko ditugu Etxahun Lekue, Maialen Akizu, Jon Maia eta Jone Uria; gai-jartzailea Idoia Anzorandia izango da. Bertso-saioa amaituta, Taberna Ibiltariak euskal kantaz beteko ditu herriko txokoak.
Zapatu arratsaldean, 19:30ean hain zuzen, Zuhaitz Gurrutxagaren Futbolistok bakarrizketa gozatzeko aukera egongo da Kultur Etxean. Domekako goiza, azkenik, magiaz beteta etorriko da. Alain Zulaika magoak familiako magia-ikuskizuna egingo du 11:30ean, Kultura Etxean; eta horren ostean, magia-tailerra egongo da Ludotekan, umeek eurek magia egin dezaten. Ekintza guztiak doakoak izango dira eta Kultur Etxera sartu ahalko da lekuaren edukiera bete arte.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).