Hobekuntza- eta mantentze-lanak egin dira Sondikan

Aikor aldizkaria 2025ko api. 30a, 13:25

Sondikako Udalak prentsa-ohar batean zabaldu duen moduan, Aste Santuan hobekuntza- eta mantentze-lanak egin ditu zenbait instalazio eta zeharbide publikotan, “sondikoztarrei kalitateko zerbitzu publikoak eskaintzeko”. Izartza kalean, esaterako, Santa Kruz ermitaren eta Olako gunearen arteko bideko espaloia jaitsi da eta zebra-bidea egokitu da, “irisgarritasuna eta segurtasuna bermatzeko”. Halaber, Gesuraga kalean mutiloiak pini dira, “autoak espaloira igotzea ekiditzeko”.

Beste aldetik, Gorondagane eskolako patioaren zoladura garbitu, eta estalkiak, erretenak eta leihoak berrikusi eta garbitu dira, baita Goronda Beko kiroldegikoak ere. Era berean, Artebe kiroldegiko sarrerako atea berritu da, eta Jubilatuen Etxeko estoreak aldatu dira. Datozen asteotan, gainera, ermitako plazako eskaileretan baranda bat jarriko da, “segurtasuna eta erosotasuna areagotzeko”.

Udalaren esanetan, lan horien bidez sondikoztarren egunerokotasuna hobetu nahi dute, eta, bereziki, adineko eta mugikortasun urriko pertsonei bidea erraztu nahi die. “Udalak Sondika inklusibo baten aldeko apustua egiten du, pertsona guztiak erosotasunez eta segurtasunez mugitu ahal izateko”.