Sondikan dena prest dute jaiez gozatzeko

"Jaien helburua da jende guztiak disfrutatzea, eta horretarako, adin-tarte guztientzako ekin-tzak prestatu ditugu”, azaldu du Deñe Sarria kultura-zinegotziak. “Jai-egitaraua osatzeko orduan, herriko hainbat elkartek egindako proposamenak eta herritarrek egindako iradokizunak hartu ditugu kontuan”. Gainera, azpimarratu duenez, “herriko elkarteak itzelezko garrantzia dute gure jaietan, eta haien laguntzari esker ekintza asko antolatu ahal izan ditugu”. Hortaz, bost egunetan zehar ekintza-sorta zabala egongo da Sondikan, eta herritar guztiek izango dute zer gozatu.

Ohi moduan, Gorondagane eskolako gurasoen elkarteak umeentzako ekin-tzak antolatu ditu ekainaren 20ko bariku arratsalderako. Ondoren, 19:00etan, kuadrillak Lehendakari Agirre kaletik igoko dira San Joan landara, elektrotxaranga batek lagunduta. Naizen elkarteak txupina eta pregoia botako du, eta ondoren kuadrillentzako probak egingo dira. “Iaz oso harrera ona izan zuten kuadrillentzako ekintzek eta horregatik animatu gara aurten ere proposatzera”. Jaietako lehen eguna amaitzeko, “Hay poco rock and roll” bertsioen kontzertuan Extremoduro, Platero y Tú eta Marea taldearen kantak entzungai egongo dira, eta erromeria ere izango da Beranduegi taldeak girotuta.

Ekintzaz beteta etorriko da zapatua. “Pikeko harresia” igoeraz gainera, kalejira eta herri-kirolak egongo dira goizean. Era berean, umeentzako jolasak eta apar-jaia egingo dira. Sukalki eta mus txapelketen ostean, gimnasia erritmikoaren erakustaldia eta skate-tailerra izango dira. “Txorierriko Padel Txapelketaren finala, bestalde, San Joan jaietako egitarauaren baitan jokatuko da, eta arratsaldean neska dj bat izango dugu: Dj Blessive hain zuzen ere”. Tolinek ikuskizuna egingo du Jubilatuen Etxean, eta tortilla txapelketa egingo da landan. Horrezaz gainera, Gorondabeko kiroldegira hurbiltzen denak hirukoitzak bota ahalko ditu, eta zapatua biribiltzeko, musika egongo da Dj Vithyren eta Gora Herria erromeria-taldearen eskutik.

Domeka goizerako antolatu dira herri-lasterketa, kalejira, dantza-agerraldia eta motorren kontzentrazioa. “Aurreko urteko jaietan moduan, herri-bazkaria solidarioa egongo da Naizen elkartearen alde”. Bazkaria BISUBI sukaldarien fundazioak prestatuko du. Nolanahi ere, hura ez da izango domekako ekintza solidario bakarra. Izan ere, aurreko urteetan egin denez, igel-toka solidarioa egingo da arratsaldean eta batzen den dirua Ataxia de Friedrich gaixotasuna ikertzen laguntzera bideratuko da. Eingo taldeak arratsaldea girotuko du, eta eguna bukatzeko, karaokea egongo da.

SUA

Astelehenean, ekainak 23, beste behin ere San Joan sua piztuko dute izen bereko landan, baina hori baino lehen, umeentzako ekintzak egongo dira goizean eta arratsaldean. “Ekintzak herrira hurbilduko ditugu, eta arratsaldean pintxo-poteoa egingo da herriko tabernetatik. Gero, 22:00ak aldera, zuziak banatuko dira liburutegian eta guztiok elkarrekin kalejiran igoko gara San Joan landaraino sua piztera”. Zalantza barik, Sondikako jaietako ekintzarik esanguratsuenetakoa da, eta su inguruan herritar asko batzen dira eguzkiari indarra emateko eta zaharra erretzeko. Txingarrak amatatu berri, martitzenean meza eta erretiratuentzako kopaua egongo da. Era berean, hainbat txapelketaren sariak banatuko dira: Sondika Pintxotan, Balkoi Apainduak, Kuadrillak eta Emakume Kontseiluko Logotipo Lehiaketa. Chimberos taldearen musika-saioaren ondoren, azken traka botako da eta jaiak amaituko dira. Bukatzeko, aipatu beharra dago bariku gauean zein zapatu gauean etxera lagunduta itzultzeko zerbitzua egongo dela 01:30ean, 02:30ean eta 03:30ean. Eraso matxisten kontrako protokoloa ere izango da, eta erasorik ikusi edo jasanez gero, aipatutako zerbitzuko pertsonengana zein txosnetako arduradunengana joko ahalko da.

EGITARAUA