San Joan jaiak, beti bezain parte hartzaileak

Hirugarren urtez jarraian, Sondikako Udalak herriko kuadrillen iritziak hartu nahi izan ditu kontuan. Proposamenak luzatzeko aukera eman zuten eta erantzuna “oso ona eta positiboa” izan dela baieztatu du Deñe Sarria Ibarrondo kultura zinegotziak. Iaz 14 kuadrillek parte hartu zuten, eta aurten ere antzeko zenbakiekin ari dira lanean. Azpimarratu dute asko direla errepikatu dutenak eta kuadrilla berriek ere eman dutela izena. “Oso pozik gaude kuadrillen erantzunarekin, kolore berezia ematen diete jaiei”.

Hori gutxi ez, eta 2025eko urte amaieran Aztarna gazte taldea sortu zen Sondikan. Hauek ere kontuan izan nahi izan dituzte egitaraua osatzerakoan. Kontzertuak antolatzerakoan iritzia eskatu diete, eta Aztarnatik jaurti zuten aurtengo kartelburu nagusia: Bengo. Gainera, herriko eta inguruko taldeei keinu bat eginez, LC27 taldeak kontzertua eskainiko du zapatu arratsaldean. Bestetik, jaien egitarauaren baitan ere jokatuko dute Aztarna taldean antolatutako futbol txapelketako finala.

Aurten, Apnabi
Sondikako San Joan jaiek gainera asko dute boluntariotik ere. Urtero, herri bazkariko dirua irabazi asmorik gabeko elkarteri bateri ematen diote. Iaz, Naizen elkarteari bideratu zitzaion eta aurten, Apnabiren txanda izango da. Elkarteak Autismoaren Espektroko Nahasteak (AEN) dituzten bizkaitarren familiak biltzen ditu. Gainera, pregoia irakurri eta txupina jaurtitzeko ardura ere izango dute. Diru bilketari dagokionez, antola- tzaileek helburu dute iazko 4.390 euroak berdintzea edota gainditzea. Horrez gain, Apnabiri beste keinu bat egin nahi izan diote eta egitarauan zaratarik gehien egongo diren ekintzak zehaztuko dituzte, hauek bereiziki zaurgarriak direlako horrelakoetan. “Elkartea herrikoa izan ez arren, badauka erlazioa Sondikarekin gure herritarren bat edo beste bertan dagoelako ordezkari edo parte hartzaile moduan, hor dago harremana”, azaldu du zinegotziak.

Hain zuzen ere, Sarria zinegotziak San Joan jaiek duten “elkarlana” nabarmendu nahi izan du. “Jai oso parte hartzaileak dira eta herriko hainbat elkartek beraien ekarpena egiten dute modu batera edo bestera urtean zehar egiten duten lan guztiaren erakusleiho bikaina izanik. Oso garrantzitsuak dira guretzat eta beraien parte hartzea ezinbestekoa da”.

Adibidez, iaz harrera oso ona izan zuen ekainaren 23ko San Joan Txiki Egunak eta aurten errepikatu nahi izan dute. “Sondikako herrigune nagusitik apur bat aldenduta dago jai ingurunea eta kale nagusietara hurbiltzeko modu ona iruditzen zaigu”, dio kultura arduradunak. Horregatik, ekainaren 23ko ekintzak herrigunean oinarrituko dira gauean kalejira egin eta San Joan suaren inguruan sondikoztar guztiak elkartu arte.

Horrez gain, Sarriak gogoratu nahi izan du, azken urteetan bezala, etxera gauez itzultzeko laguntza zerbitzua egongo dela: bariku eta zapatu gauean, 01:30ean, 02:30ean eta 03:30ean. Eraso matxisten kontrako protokoloa ere izango da.