laburrean

Euskera Alkarteak antolatuta, zapatuan, ekainak 27, Lagatzu Eguna ospatu zuten Zamudion. Euskal Jaiko bazkarian 335 lagun elkartu ziren, baina jai giroa egun osora luzatu zen: goizeko talde ginkanatik hasita gaueko erromeriko azken abestira arte.

Beste urte batez, Mihiluze txapelketak “izugarrizko arrakasta” izan du Txorierriko 10-11 urteko umeen artean. Ikastetxeetan, 5. eta 6. mailan 363 ume egon dira klasean ikasturte honetan eta horietatik 198 ume ibili dira ludoteka eta gazteguneetan, otsailetik maiatzera jolasten: Deriotik 82, Larrabetzutik 34, Lezamatik 38, Sondikatik 24 eta Zamudiotik 20 ume.

Ekidazu abesbatzaren 25. urteurrenean, Lezamak hartu zuen domekan, ekainak 14, 41. Bizkaiko Abesbatzen Eguna. 48 abesbatza eta 700 lagun inguru elkartu ziren. Hurrengo urterako Muskizko Oihartzuna abesbatzak hartu du lekukoa. Aurten, esker on berezia egin diote Ramon Bustamante kazetari eta aurkezleari.

36 postuk eta lau upategik parte hartu zuten domekan, ekainak 7, Lezamako 23. Txakolin Egunean, Eguraldi eguzkitsuarekin, jendetza elkartu zen herrigunean. Ekidazu abesbatza da bere 25. urteurrenean 2026ko Lezamako Txakolinaren Enbaxadorea.