Beratze karbonikoa

Beste gauza batzuen artean, beratze karbonikoa duten 2007. urteko ardo beltzak dastatzeko proposamena egin nizuen aurreko alean. Horiek atera berri dira merkatura, eta prest ditugu euren usainaz eta freskotasunaz gozarazteko. Beratze Karbonikoko teknika geure-geurea dugu, eta oraingo honetan sakonago ezagutzeko proposatzen dizuet. Prozesua hasi ahal izateko, mahatsak osasuntsu eta osorik ailegatu behar du upeltegira, prozesu mekanikoak saihestuz. Ondoren, mahats-mordoak osorik sartuko dira deposituetan. Pisuak eta mahatsak berak egiten duen presioaren eraginez, mahats-mordoaren beheko aldean daudenak apurtu, eta hartzidura alkoholikoa hasten dute (oxigenoa desagertuz, eta CO2a sortuz). Mahatsaren zelulek momentu horretan ekiten diote zelula arteko hartzidurari, gradu bi alkohol sortuz. Alkoholak mahats-aleak leherraraziko ditu. Jarraian ohiko hartzidura alkoholikoa sortuko da, zeinak muztio-ardoa orujoetatik bereizteko aukera emango baitigu. Muztio-ardo hori orujoak prentsatu ostean lortzen den muztio-ardoarekin nahastu, eta depositu ezberdinetan hartzituko dira, azukreak alkohol bihurtzeko. Eta horrela lortuko dugu ohiko eskilarapekoa edo urteko ardoa. Fruta, kolore eta gozotasun handiko ardoa izango da, eta gutxienez urtebete iraungo du. On egin!