Bakoren bazterra: Elkartze korapilatsuak

Kaixo Aikor!-lagunak! Gastronomia jokoaren alderdien artean, nire iritziz, liluragarriena den batez egingo dugu berba oraingo aldi honetan: elkartzeaz. Elkartzeak plateraren eta edariaren arteko harremana adierazi nahi du, ziur aski zuetako askok jakingo duzuenez. Oreka-erlazio bat sortzea da, jaki batez gozatzeko aukerak gehitzeko. Hala ere, ez gara hasiko aipatzen zein diren elkartze bati ekiteko jarraibide orokorrak; beste ikuspuntu bat hautatuko dugu: ezerekin eta inorekin uztartzen zailak diruditen jaki edo platerak, zeinahi dela ere zailtasun horren iturburua: dela aditzera ematen duten nortasuna, dela haien oinarrizko osagaien uztartzeko zailtasuna. Berez, oso ohikoak dira halako jaki edo platerak, baina, konbinatu nahi ditugunean gozamena handitzeko, zaildu egiten dizkigute gauzak. Adibide batzuk emango ditugu: a) Zainzuriak. Zainzuri berdeak zapore sendoa du, mikaztasuna du nagusi; berdin da su bizian erregosirik badago, gainerrerik edo era errazean prestaturik. Hori gutxi balitz, haren sulfuro kopuruak kontuan hartzeko modukoak dira: horrek are gehiago korapilatzen du konbinatzea; gainera, olio-ozpina bezalako saltsaren bat gehitzen badiogu, benetan zaildu egiten da konbinazioa. Nire gomendioa da xerez ardo idor batez edo lager garagardo batez dastatzea, edo, bestela, estra batez, olio-ozpinez aurkeztuz gero. b) Entsaladak. Entsaladen hiru alderdik zailtzen dute entsaladak edariren batekin ondo uztartzea: barazkiek duten ur neurri altua, barazki askoren zapore mikatzak eta osagaietakoren baten –adibidez, tomatearen– eta, batez ere, maneatzeko erabiltzen den ozpinaren zapore garratzak. Eragozpen horiekin, xerez idorra, manzanilla eta amontilladoa dira ardo egokiak. Garagardoa ere egoki dator kasu honetan. c) Roquefort eta Cabrales gaztak. Edariekin elkartzean sendotasuna eta zailtasuna bilatzen baditugu, hauekin aurkitu ditugu. Nire gomendioa da intereseko ezkontza bat egitea PX (Pedro Ximenez), Sauternes edo Barsacs familietako ardo gozoekin, behar den besteko ukitu glizerikoa ematen baitiete gustua orekatzeko. d) Txokolatea. Gastronomo askoren iritziz, mutilzaharra da, baina konbinazio batzuk dasta ditzakegu; nire iritziz, atseginak. Txokolatea mehea bada, garraztasun orekatua eta oroipen zitrikoak dituen moskatel bat etor daiteke ondo. Txokolateak kakao portzentaje handiagoa badu eta mikatzagoa bada, aldaera beltzetako ardo gozoekin elkar dezakegu; esaterako, Jumilla Monastrellekin. Aurrera ere plater-edari erlazio orekatu gehiagotan pentsatzen jarraituko dugu. On egin!