Hau bai hau!

t: Joseba Butroe, irakaslea
Egia esateko, mira eginda edo harrituta geratzeko motiborik ez dugu faltan. Komunikazio teknologiei esker munduko berri dugunetik entretenituta bizi gara. Lehen, ba, pasadizo xelebreren bat edo beste modan egoten zen denbora batean, luzaroan batzuetan: ez dakit non, ez dakit nori gertatua... Hango barreak! Haren barreak! Orain ere lehengo antzera, xelebrekeriarik ez da falta, baina askoz ere arinago eta lasterrago agertzen eta desagertzen dira, ze gaur egun “suzedido”ren bat zabaldu orduko beste pilo bat egoten dira ilara egiten, itxaroten, telebistetan.... Eta zer esanik ez Interneten, hor bai hor entretenimendu amaigabea! Baina txarrena azkenean dena entretenimendua dela pentsatzera heldu gaitezkeela. Xelebrekeria baten ostean halako bonbardeo batzuen albisteak komentatzen dira naturaltasunez, edo langabeziaren datuak, edo... Baina inportanteena kafekoletxeak edo antzeko graziak dira, ze bizitzen jarraitzeko animo apur bat ere behar da-ta, ezta? Baina, egia esateko, larritzeko modukoak dira gaurko portaerak: txikikeriekin motibatu eta gauza serioekin askok zirkinik ere ez.