Txorierriko 200 ume matrikulatu dira D ereduan

2008-2009 ikasturtean izena emateko epea joan den astean bukatu zen. Orotara, 206 ume matrikulatu dira Txorierriko herri ikastetxeetan: 60, Sondikan; 63, Derion; 36, Zamudion; 27, Lezaman; eta 21, Larrabetzun. 2007-2008 ikasturtean 252 umek eman zuten izena. Herri ikastetxeotan D eredua baino ez dago. Beste alde batetik, Mankomunitateak ‘1+1=bi’ kanpaina zabaldu zuen maiatzean. Kanpaina hori bi eta hiru urteko umeen gurasoei egon da zuzenduta, eta horiek seme-alabak D ereduan matrikulatzera animatzea izan du helburu. Haurrek eredu horretan ikasteak dakartzan onurak azaldu zaizkie foileto baten bidez, eta umeei puzzle bana agindu zaie. Herri ikastetxeetako bi urteko gelek 175 ume hartuko dituzte 2008-2009 ikasturtean: 43, Sondikan; 55, Derion; 34, Zamudion; 25, Lezaman; eta 18, Larrabetzun. Era berean, datorren ikasturtean lehenengo aldiz eskolara joango diren 20 umek eman dute izena hiru urteko gelan: 11, Sondikan; 5, Derion; 2, Zamudion; eta 2, Lezaman.