Euskaraz ikasteko kanpainak

Txorierriko Mankomunitateak euskaraz ikasteko kanpaina bi jarri ditu martxan. Bata, “Zeurea da aukera” lelopean, Derrigorrezko Hezkuntza amaitu dutenei dago zuzenduta eta laster banatuko da bailara osoan. Gazteek gutun-azala jasoko dute, eta bertan D eredua eskaintzen duten Bigarren Hezkuntzako Bizkaiko institutuen berri izango dute: non daude, eskaintzen duten hezkuntza mota, telefono zenbakia, nola joan, garraiobideei buruzko informazioa…. Liburuxka horrekin batera Eñaut Elorrieta Ken Zazpi taldearen abeslariak sinatutako gutuna ere helduko zaie. Horrek ikasi nahi dutena askatasun osoz aukeratzeko gonbidapena luzatuko die gazteei. Gainera, sakeleko telefonoa babesteko “galtzerdia” ere sartuko dute gutun-azalean. Beste kanpainak gurasoek 2-3 urteko seme-alabak D ereduan matrikulatzea du helburu eta Bizkaiko Foru Aldundiarekin batera zabaldu da. Gurasoek liburuxka jaso dute, eta bertan azaltzen dira D ereduaren onurak, eta aurten Bizkaian zenbat ikasle eta zein eredutan matrikulatu diren. Halaber, joko bat agindu dute umeentzat.