Txorierriko Mankomunitateko Euskara Zerbitzuak kanpaina berria jarri du martxan: “Euskara, eskutik eskuraâ€. Ekimenak tabernetan eta dendetan euskararen erabilera sustatzea du helburu, eta modu egokia ere bada herritarrek erosketak Txorierrin bertan egin ditzatela bultzatzeko. Kanpainarekin bat egin duten merkatariek eta ostalariek puzzlearen irudia duten esku-orriak banatuko dituzte bezeroen artean. Azken hauek, erosketa bat euskaraz egiten duten bakoitzean, puzzlea betetzeko pegatina-pieza bat eskatu beharko dute. Saltoki bakoitzak puzzlearen pieza mota bakarra edukiko du, eta bezeroak herriko saltoki ezberdinetara joan beharko dira puzzlea osatu ahal izateko. Orotara bederatzi pegatina-pieza eskuratu beharko dira. Puzzlea osatu ostean, esku-orrian eskatzen diren datuak bete, eta hura udaletxeetan atondutako kutxetan sartu beharko dute. Parte-hartzaileen artean euskarazko GPS bat zozketatuko da herri bakoitzean. Kanpainak ekainaren 25era arte iraungo du eta bezeroek nahi beste puzzle egin ahalko dute. Zozketak hurrengo asteetan egingo dira, eta irabazleen izenak saltokietan ipiniko diren kartelen bidez jakinaraziko dira.
Hiztegiak
Bestetik, aipatu beharra dago Euskara Zerbitzuak 350 menu baino gehiago biltzen dituen hiztegia prestatu duela. Hiztegia Txorierriko taberna eta jatetxe guztiei dago zuzenduta, eta horiek euren eskaintza euskaraz egin dezatela du helburu. Besteak beste, lehenengo eta bigarren platerak, postreak, edariak, pintxoak eta ogitartekoak jaso dira hiztegian. Era berean, tabernetan eta jatetxeetan ohikoak diren elkarrizketatxoak batu dira lanean. Hiztegia paperezko formatuan zein euskarri informatikoan egin da. Kopia bat eskuratu nahi duenak telefono honetara egin dezake deia: 94 448 00 00 (Pello).
Euskara