Goizean, Belen euskaltegian batu zen lankide eta ikasleekin. Omenaldi xumea izan zen, baina handik guztiak abiatu ziren bazkaltzera “Sorpresa itzela hartu nuen, sorpresa ona. Eta oso hunkigarria, noski”, esan digu Belenek. “Baserri Antzokira joan ginen, baina aparkalekuan utzi beharrean, errepidean jaitsi nintzen. Arraroa zen, baina hainbat jende sarreran nire zain ikusi nuenean argi ikusi nuen. Ez nuen autotik atera nahi (kar, kar)”.
Guztira, 140 lagun batu ziren Belenen omenaldian: hainbat elkarte, euskaltzale, ikasle eta lankide ohi. Iñaki Beitiak harrera egin eta gero bazkaria izan zen. Ostean, Olga Loroñok eta Jasone Herrerok, Belenen ordezkariak euskaltegian, brindisa egin zuten eta Irkus Robles-Arangiz margolariak margolana oparitu zion Beleni. Era berean, bideo bat igorri zen eta bertan omenaldian egon ezin izan ziren lagunek esker oneko hitzak eskaini zizkioten. Bukatzeko, Belenen hainbat argazki ikusteko aukera egon zen pantaila erraldoian.
“Hainbat lagun batu ziren, Txorierriko herri guztietakoak. Harrigarria izan zen. Banan-banan ibili nintzen agurtzen, baina ez nuen astirik guztiei eskerrik asko esateko. Pozik nago omenaldia bizirik nagoela egin didatelako (kar, kar). Bestela, ez nuke jakingo jendeak erantzun ederra eman didala”.