Borrokak ikusmin handia sortu zuen boxeoaren zaletuen artean. Antolatzaileek “La Velada del Millón” esan zioten borrokari, eta telebistak pay per view (ikusteagatik ordaintzea) modalitatean eskaini zuen. Era berean, Miribillan 11.000 zale batu ziren, borroka zuzenean ikusteko. Gehienak, noski, Kermanen aldekoak. Ez da batere ohikoa hainbeste lagun batzea, boxeoa ikusteko. Epaileek emandako puntuek adierazi zuten moduan –90-99, 92-98 eta 91-99– lehia zaleek zein adituek espero zuten bezain bizia izan zen. Boxeolari biek erakustaldi ederra egin zuten, nork bere estiloan: Kerman, beti aurrera; eta José, primeran defendatzen eta kontraerasoan jokatzen. Hala ere, Lejarraga erosoago ibili zen ringean eta arerioa baino hobea izan zen.
Hasieran, boxeolari biak patxadaz ibili ziren. Ez da harritzekoa, Espainiako txapeldunaren gerrikoa jokoan baitzegoen. Baina hirugarren roundetik aurrera, Kermanen erasoak gero eta bortitzagoak izan ziren. Era berean, txapeldun ohia sendo ibili zen defentsa-lanetan. El niñok gogor eutsi zien kolpeei eta bere eskarmentua argi eta garbi erakutsi zuen Miribillan. Del Ríok Morgako boxeolariari ezkerreko bekaina ere ireki zion seigarren roundean. Baina epaileek borroka jarraitzeko baimena eman zioten Kermani eta horrek erasoan jarraitu zuen.
Ameriketan
Azkenean, Kermanek gerrikoa ez ezik, Europa mailako txapelketaren bat borrokatzeko aukera ere irabazi zuen. Bere ibilbidea gora doa etengabe: udan, Lou DiBella sustatzaile estatubatuarrak kontratatu zuen, Ameriketan borrokan ibiltzeko. Kermanek han egindako borroka biak KOz irabazi ditu. Iaz, WBA elkartearen hiru tituluak eskuratu zituen eta gaur egun munduko boxeolaririk onenenetarikoa da welter mailan.