Txorierriko Zerbitzuen Mankomunitatea, euskara elkarteak eta gainontzeko eragileak elkarlanean arituko dira, dinamika hori gure bailaran martxan jartzeko. Horretarako, 2018an frogatuko dute txorierritarrok 11 egun euskaraz bizi ahal garela, azaroaren 23tik abenduaren 3ra arte hain zuzen ere. Dinamikaren haritik, 16 urtetik gorako txorierritarrak ahobiziak eta belarriprestak izango dira.
Ahobiziek ulertzen duten guztiei euskaraz hitz egingo diete, eta ezagunei ere euskaraz esango diete lehen hitza. Belarriprestak gutxienez euskaraz ulertzen duten lagunak izango dira, eta gainontzekoei euskaraz aritzeko gonbidapena luzatuko diete. Dinamika honetan parte hartzeko izen-ematea zabalduko da eta bakoitzak identifikaziorako txapa bat edukiko du.Txorierriko sei udalerrietan batzordeak osatuko dira dinamika martxan ipintzeko.