Larrabetzun, esate baterako, egitarau oparoa prestatu dute: goizean, irteera bat egingo dute; ostean, azoka bat, herriko plazan; eta eguerdian, herri bazkaria. Bertan parte hartu ahal izateko, 20 euroko txartelak erosi behar dira Etorki tabernan. Bazkaldu ostean, briska txapelketa eta pilota-jaialdia jokatuko dira. Pilota-partidak Txokoan eta Olarreta herriko pilota elkarteek antolatu dituzte. Beraz, Larrabetzuko pilotariak arituko dira hainbat kategoriatan. Eguna borobiltzeko, Euskal Herriko etxeei eta baserriei buruzko hitzaldia eskainiko da Gure Etxean.
Era berean, Zamudioko eta Derioko Nekazal Kooperatibak ere antolatu ditu ekintza batzuk. Goizean, opari bat emango diete naturari buruzko marrazki bat hara eramaten duten gaztetxoei eta, jarraian, idi-probak egingo dira, Zamudioko Zubieta eta Zumeltzuren eskutik. Geroago, kooperatibako bazkideak elkartuko dira bazkaltzeko. Egun osoan zehar trikitilariak egongo dira. Azkenik, Lezamako kooperatibak ere ospatuko du baserritarren eguna eta bazkideen arteko bazkaria egiteaz gain, goizean idi zein zaldi-probak antolatuko dituzte.