Lehiaketan parte hartzeko, minutu batetik eta bost minututara bitartean irauten duen bideo bat bidali beharko da info@azkuefundazioa.org helbidera, ekainaren 15etik 30era bitartean, .mov edo .mp4 formatuan. Youtube webgunera pribatuan igotako lanek ere izango dute lehiaketan parte hartzeko aukera.
Antolatzaileek askatasun osoa eman diete lehiakideei, bideoen gaia hautatzeko orduan, baita horiek grabatzeko era aukeratzeko ere. Hala ere, Azkue Fundazioak eta Bilboko Udalak muga batzuk jarri dituzte eta ez dituzte bideo batzuk onartuko, hau da, giza eskubideen urraketa, bortizkeria, irainak, arrazakeria, sexismoa edota errespetu faltak adierazten dituztenak. Parte-hartzaile bakoitzak nahi beste bideo bidali ahalko ditu.
Era berean, antolatzaileek baldintza hauek eskatzen dizkiete bideoei: aurten grabatuak, originalak eta argitaratu gabeak izan behar dute. Eta ez da onartuko aldez aurretik beste lehiaketaren batean aurkeztutako lanik. Eta noski, bideoak hizkuntz edukiren bat izatekotan (ahotsa, musika, elementu grafikoak...), honek euskarazkoa behar du izan. Honekin batera, lehiaketaren oinarriak daude irakurgai.