Logoa
Logoa
aikor.eus

Akarbaltz gaua ospatuko dute Larrabetzun; Arimen gaua, Zamudion

  Kultura  Txorierri

Akarbaltz gauak helburu hauek ditu: herriko iruditeria barneratzea, Mari, Basajaun eta Kukubiltxo bezalako pertsonaien bitartez, eta Larrabetzuko auzoak eta baserriak ezagututa; lurrarekiko atxikimendua lantzea; sorgintzat erre zituzten emakume baserritarren aldarria egin eta lurrari lotutako jakintzaren transmisioaren garrantzia nabarmentzea; eta emakumeen kontrako jazarpenari aurre egiteko, herrikideen arteko elkartasuna eta babesa sustatzea.

Helburuak lortzeko, ekintza batzuk jorratuko dituzte eskolako umeekin gaurtik eguaztenera arte, hala nola maskarak egitea, ipuin bat irakurtzea, eta landareen eta baratzeen gaineko saioa. Akarbaltz gaua urriaren 31n izango da eta egitarau oparoa antolatu dute arratsalderako. Hori Bai gaztetxean batuko dira 17:00etan. Bertan, eskolakoek sortutako bertsoak kantatuko dituzte, eta  ostean, Akarbaltzarekin irtengo dira kalera, haren lagunen bila. Bizkargi dantza taldeak Xabi Solanoren Erre zenituzten abestirako egindako koreografia dantzatuko dute plazan, eta “edabe magikoak” eskainiko zaizkie umeei. Nagusien kalejira 19:30ean irtengo da plazatik, eta 20:00etatik aurrera erromeria egongo da Hori Bai gaztetxean, Gauragi taldearen eskutik.

Bestetik, Zamudion Arimaren Gaua ospatuko dute eta bertan ere ekitaldiak antolatu dituzte urriaren 31ko arratsalderako. Ekitaldiak Kultura Etxean izango dira. Kandelak eskuan daramatzatela, 20:00etan irtengo dira kalejiran eta 20:30ean mozorroen desfilea egongo da. Azkenik, gaztaina erreak eta kalabaza-gozokiak eskainiko dituzte 21:00etatik aurrera. Bada, esaerak dioen moduan, Xanduli, manduli, kikirriki… eman gozokiak guri!  

2018/10/31 17:00:00

Larrabetzu eta Zamudio | Txorierri

Ekitaldi gehiago »»

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa