Metroaren 3. linea martxan jarri zenetik, eta Txorierri linea horretan integratuko zela agindu bazen ere, txorierritarrok beste bidaia bat ordaindu behar dugu garraio-aldaketa egiten badugu, hau da, trenetik atera eta metroa hartzeagatik; Kukullaga-Matiko zatia erabiltzen dutenek, berriz, ez. Loiu, Sondika, Derio, Zamudio eta Lezamako alkateek Garraioen Partzuergoari berriro eskatu diote bere plan estrategikoan azter dezala garraio-aldaketa ordaindu behar ez izateko aukera, “metroko 1. eta 2. lineetako erabiltzaileekin alderatuta, neurri diskriminatzailea delako”.
Bestalde, beste proposamen batzuk egin dituzte Partzuergoak bere plan estrategikoan sar ditzan: bariku goizaldean tren-zerbitzua ipintzea; Loiu eta Bilbo lotzen dituen autobusaren maiztasuna handitzea; Loiuko aireportura joateko garraio-lotura ipintzea; eta Mungia, Bakio edo Bermeo Bilborekin lotzen dituen autobusekin lotura jartzea.
Azkenik, alkateek eskertu dute 3. lineak herritarren mugikortasuna hobetu izana, zeren, Euskotrenek urtarrilean jakinarazitako datuen arabera, Txorierriko lineako erabiltzaile-kopurua % 19,1 handitu baita aurreko urtearen aldean. Bizkaiko Garraioen Partzuergoak proposamenen bideragarritasuna aztertzeko konpromisoa hartu du.