Guztira, hainbat sektoretako 30 enpresak baino gehiagok hartu dute parte ekimenean: Matrici, Semtek Therapeutics eta Aleovitro laborategiak, ITP Aero eta ZIV Automation ingeniaritza-enpresak, IMQ Zorrozaurre klinika, Ertzaintza, suhiltzaileak, eta Bizia eta Etorkintza fundazioak, besteak beste. Ikasle bakoitzak langile batekin emango du egun osoa, langilea lanean dabilela. Hau da, gazteak lanbide horren errealitatea ezagutzeko aukera izango du. Gainera, lanbideari eta lanpostuari buruzko zalantzak-eta galdetu ahal izango dizkio langileari. Egonaldiak ikasle bakoitzak egindako eskaeraren arabera diseinatu dira, bere neurrira.
Enpresetan egonaldiez gain, Gaztedi gazteen enplegua hobetzeko programak lan-munduaren errealitatera gerturatzeko beste aukera batzuk eskaintzen ditu, hala nola enpresa eta erakundeetarako bisitak eta sektore-mahaiak. Azken horien barnean, IDDTEK eta ZIV enpresetako langileak ikastetxeetara joaten dira, enpresaren errealitatearen berri ematera eta beren esperientziak aurrez aurre kontatzera.