Kukularra proiektuaren lehen fasearen lanak bakarrik N-637 errepidean egin dira eta lehendik egon den trazadurari eutsi zaio. Hala ere, Foru Aldundiak esan duenez, nabarmen hobetuko du Arrontegiren eta Asuaren/Enekuriren arteko zirkulazioa. Zehatz-mehatz, lanak egin dira Enekuriko jaitsieraren azpian dagoen pasagunean hiru errei egoteko; Kukularran, Deriorako noranzkoan, taula zabaldu da lau errei izateko; eta, azkenik, errei bi egin dira Arrontegi-Kukularra adarrean. Azken lan horren ondorioz, lau errei daude Arrontegin, Asuako irteeratik Kulukarrarako irteeraraino. Lanak 2,3 kilometro luze den errepide-zati batean egin dira eta beharretan 5.122.513 euro ipini dira. Bestetik, falta diren atontze-lanak gauez egingo dira. Bigarren fasea udan hasiko da, lanak esleitu ostean. Lizitaziorako aurrekontua 10.062.693 eurokoa da (BEZa barne) eta aurreikusi da lanak 21 hilabeteren buruan amaituko direla.
Erreia Arrontegiko bidezubiaren amaieratik Enekuriko jaitsieraraino (BI-604) doa eta Kukularra proiektuaren lehen fasearen barruan eraiki da. Lanetan 11 hilabete eman ondoren eta oraindik lan batzuk falta direla –drainatze-erremate batzuk, seinaleztapena, balizak…–, Bizkaiko Foru Aldundiak erabaki du erreia asteon zabaltzea, mugikortasuna eta bide-segurtasuna hobetzeko eta tarte horretan pilaketak murrizteko. Izan ere, Txorierriko korridorean (N-637) 135.000 ibilgailu baino gehiago ibiltzen dira egunero.