Auzipetuak euskal presoen aldeko zenbait elkartetan ibili dira, eta Donostian egindako prentsa agerraldian azaldutakoaren arabera, hau izan da euren lana: presoen eta erbesteratuen osasuna artatzea, euskal preso politikoen eskubideen aldeko mobilizazioak antolatzea, presoen eta erbesteratuen defentsa juridikoa, senide moduan antolatzea eta preso eta erbesteratuentzat bitartekari-lanak egitea. “Gure printzipio politiko eta etikoei loturik aritu gara uneoro, eta lasai gaude egin dugunarekin”. Bost eta sei urte pasatu dira atxilotu dituztenetik eta behin-behineko askatasunean daude. Euren esanetan, auzi luze honek euren bizitza ez ezik, senideen bizitza ere baldintzatzen du eta azpimarratu dute gaur egun 38 adingabe dituztela euren zaintzapean.
“Aro berri baten testuinguruan egiten ari ginen lana: urteetan luzatu zen gatazka konpontzeko bide berriak lantzen ari ziren, eta logika horri loturik ari ginen gu ere, ilusioz, presoen eta erbesteratuen gaia konpontzeko eginahalean. Horregatik kolpatu gintuzten estatuaren estolderietan diseinatu zituzten polizia-operazioen bidez. Egindako lana eta aldarrikapenak berresten ditugu gaur egun ere bai”, esan zuten.