Jardunaldia goizeko 10etan hasiko da. Isabel Pintok, Bizkaiko Foru Aldundiaren Gaztedi Planaren Txorierriko koordinatzaileak, lana topatzeko aholkuak emango dizkie gazteei, eta, ondoren, Iñigo Mazo EGAZeko ekintzailetzako teknikariak azalduko du zeintzuk diren eskualdean gazteen ekintzailetzarako eskaintzen diren laguntzak. Era berean, sustatzaileen ideiak tutorizatzeko eta martxan jartzeko zerbitzuari buruzko azalpenak ere emango ditu. Bestalde, Txorierriko prestakuntza-eskaintza eta enpresek eskatzen dituzten profilak aztertuko dira.
Saregileak programako Iñigo Umaranek bekei, enpleguari eta prestakuntza edo enplegua lortzeko ezagutu beharreko beste alderdi batzuei buruzko informazioa emango die gazteei, eta Haize Truebak azalduko du nola heldu zion ekintzailetzari ‘Mujer Inspira’ programaren bidez. Trueba Kuvu plataformaren sortzaileetako bat da. Hori ostatua partekatzeko plataforma bat eta gazteak eta etxean lekua duten adinekoak harremanetan jartzen ditu.