Borroka oso laburra izan zen. Borrokalari biek errespetua adierazi zioten elkarri, eta hasieran ez zioten elkarri kolpe handirik eman. Borrokatu baino lehen, lasaiago arituko zela esan zuen Morgako errebolberrak eta horixe saiatu zen egiten. Hala ere, kolpeak hasi zirenean, errusiarra euskalduna baino zehatzagoa izan zen eta Lejarraga birritan bota zuen lurrera. Bigarren erorikoan, epaileak borrokari amaiera ematea erabaki zuen.
Ez zuen ematen Lejarraga hain txarto zegoenik, baina epaia behin betikoa izan zen. Kerman oso haserre eta etsituta agertu zen, epailearen erabakiarekin bat ez zetorrelako. “Baina zer egin duzu?”, galdetu zion epaileari. Txutxi del Valle boxeolariaren entrenatzaileetako bat ere ibili zen kexaka. Baina alferrik. Borroka bukatutakoan, Morgakoak ez zuen adierazpenik eman nahi izan. Guztira, 8.000 zaletuk ikusi zuten borroka zuzenean; gehienak etxeko borrokalariaren aldekoak ziren, eta haiek ere azaldu ziren triste.
Kerman Lejarragak (28 garaipen, 2 porrot) 27 urte dauzka eta oraindik zeresana dauka boxeoan. “Itzuli egingo gara”, iragarri du MGZ Promotions enpresak ohar batean. Era berean, MGZ-ko lagunek esan dute Morgakoa ez dela berriro welter pisuan arituko, superwelter baizik. “Kermani izugarri kostatu zitzaion welter mailan eskatzen den pisuari eustea, eta horregatik erabaki dugu superwelter pisuan lehian sartzea”.