Kalabazak piztu ziren Arimen Gauean

Halloween festa gurera etorri baino askoz lehenago, Euskal Herriko txoko askotan Gau Beltza edo Arimen Gaua ospatzen zen Santu guztien egunaren bezperan. Ohiturak XX. mendera arte iraun zuen, eta Sondikan eta Zamudion ahalegin berezia egiten dabiltza usadio zaharrak berreskuratzeko edo berrinterpretatzeko. Gainera, Larrabetzun Akarbaltz Gaua ospatzen dute 2005etik hona, eta hura mitologiarekin, sorginekin eta lurrarekin lotzen dute.

Antzina, kalabazak eta arbiak hustu, begiko, sudurreko eta ahoko zuloak egin, eta haien barruan kandelak pizten ziren. Kalabazak-eta bide bazterretan uzten ziren hildakoen arimei bidea erakusteko. Era berean, gazteak eta umeak etxeko trapu zaharrekin mozorrotzen ziren auzokideak beldurtzeko. Familiek gaztainak jan ohi zituzten, eta, herri batzuetan, umeak eskean ibiltzen ziren. Elkarteek eta erakundeek Txorierriko kaleetara ekarri dituzte berriro ohitura horiek.