Inauteriak, martxan

Hamaika aurpegiko egunak

Inauterietako atarian gaude eta udalerri gehienek egitaraua zehaztuta dute dagoeneko. Sondikan datorren astean ospatuko dira, baina gainerako herrietan gaur bertan hasiko dira. 

Gaur, 18:00etan, ogi txigortu eta mozorro lehiaketa egongo da Zamudioko Gaztestazioan; eta bihar, 11:30ean, mozorro-tailerra, liburutegian. Hilaren 22an ere, 18:00etatik aurrera tostada lehiaketa eta erromeria izango dira Adintsuen Etxean. Azkenik, domekan, 12:00etan, umeentzako erromeria eta mozorro lehiaketa egingo dira Ludotekan. Kategoria bi egongo dira: sei urtera arte eta sei urtetik bederatzi urtera arte. Kategoria bakoitzeko hiru sari emango dituzte: lehenengoa, 50 euro; bigarrena, 30 euro; eta hirugarrena, 20 euro.

Lezaman, bihar ospatuko dituzte Inauteriak. Ekintzak 18:00etatik 01:00etara izango dira frontoian: umeentzako tailerrak, artista eta mozorro lehiaketa, photocall-a, sariak banatzea eta diskofesta, besteak beste.

Larrabetzuko Kulturbilguneak Maskaritaren kalejira antolatu du gaurko. Gainera, leihoak eta balkoiak apaintzeko deia egin diote herritarrei. Kalejiraren ondoren, 50 euroko hiru diru-txartel zozkatuko dituzte parte-hartzaileen artean, herriko dendetan gastatu ditzaten.