Koronabirusa

Elhuyarrek prestatutako “COVID-19aren izurria argitzen” bideo-pilulak egunero zabalduko dira aikor.eus atarian

Elhuyar Zientziako lantaldeak bederatzi bideo-pilula prestatu ditu koronabirusaren inguruko argibideak emateko. Bideoak egunero-egunero argitaratuko dira eta lehena gaur zabaldu da. Ana Galarraga Aiestaran Elhuyarreko kideak minutu bateko bideoetan hainbat gai landu ditu, hala nola birusaren jatorria, komunitate zientifikoaren ahalegina, adinaren araberako eragina, emakumeak zaurgarriago izatea eta tratamenduak.

Edukia Elhuyarren gizarte-sareetan eta zientzia.eus atarian zabalduko da, baita euskarazko 30 hedabide baino gehiagotan ere; aikor.eus webgunea, haien artean. Koronabirusak sortu duen egoera berezi honetan, Elhuyarren ustez, herritarrei euskarazko informazio irizpideduna eta kalitatezkoa ematea ezinbestekoa da. Eta lan horrek hedadura handiagoa izan dezan, aukera aprobetxatu du, edukia guztion eskura jarrita, euskarazko komunikabideekin elkarlana sendotzeko.