Korrika 2022ra atzeratuko da, koronabirusaren eraginez

Korrikaren 22. edizioa ez da 2021ean antolatuko, 2022an baizik. Arrazoia, koronabirusa, Asier Amondo Korrikaren arduradunak prentsaurrekoan azaldu duenez. “Orain dela 15 egun hartu genuen Korrika atzeratzeko erabakia; erabakia latza da, eta badakigu atzeratzeak kalte egingo diela euskararen aldeko bultzadari eta lasterketaren helburu ekonomikoari”, esan du. Egungo egoera sanitarioa ikusita, AEK-k birusaren hedapena “ahalik eta gehien murrizteko” hartu du erabakia, Korrika behar bezala egiteko beharrezkoak baitira “kalea, bizia eta mugimendua”.

AEK-k prentsaurrekoa aprobetxatu du, Euskaraldiaren aldeko adierazpena egiteko. “Unea baliatu nahi dugu martxan den 2. Euskaraldian parte har dezagun; belarriprest edo ahobizi izan gaitezen animatu nahi dugu korrikazale oro”. Gainera,  lanean jarraitzeko asmoa aipatu du, “euskaltegietara hurbiltzen ari zaizkigun milaka lagunek eskolak modurik eragingarrienean ikas ditzaten eta euskarak toki handiagoa har dezan”.