Hainbat kirol-elkartek eskatu dute eskola-kirola berriro martxan jartzea

Guztira 235 euskal kirol-elkartek sinatu dute adierazpen bat, kirol federatua eta eskola-kirola berriro martxan jartzeko. Kirol-elkarteek Bultza Kirola Euskadi plataforma eratu dute. Elkarteak Euskal Autonomi Erkidegokoak dira, eta haietako batzuk, Txorierrikoak: Beste Bira atletismo-taldea, Uritarrak futbol-taldea eta -eskola, Olarreta Pilota Elkartea, Zamudio KE eta Lizeo Frantzesaren gurasoen elkartea. “Ez dugu ulertzen Eusko Jaurlaritzak hartu duen erabakia. Kutsatze-maila % 0,30 ingurukoa da kirol-jardueretan; beste arlo batzuetan, aldiz, altuagoa izan arren, ez dira eten”, esan dute.

Elkarteek aipatu dute pandemiak lan ikaragarria ekarri diela: dokumentazioa, ikastaroak… Gainera, protokolo zehatz bati aurre egin behar diote: ibilbideak, seinalizazioa, aforoak, desinfekzioa, tenperatura hartu… Hau da, “erantzukizuna” erakutsi dute. “Hala ere, Eusko Jaurlaritzak ez du hori guztia kontuan izan eta ez digute entrenatzen uzten”.

Oharrean aipatu dutenez, kirola bertan behera uzteak arazoak ekarriko ditu. “Klubak hustu egingo dira, jendea kiroletik aldenduko da eta beste jarduera indibidual eta asozialago batzuetara joko du… Eta kirolik egiten ez badute, ez dute aisia pasatzeko alternatiba handirik izango: kalean egongo dira elkarrekin, ziur asko distantzia barik, maskara barik, desinfektatzen ez diren parkeetan”. Era berean, taldeko entrenatzaileak eta monitoreak langabezian geldituko dira eta, ondorioz, “kirolaren inguruko sarea desagertuko da”.