“Taldekide batzuk, esaterako, tabernan batzen ziren, kafe bana hartzen zutela, euskaraz egiteko. Tabernak itxita, gehienez sei laguneko taldeak kalean eta parkeetan biltzen dira orain, pasieran ibiltzeko. Nolanahi ere, tabernak zabaltzen direnean, nahi badute, bertan batuko dira berriro. Egoerara moldatu baino ezin da egin”, esan du Itsasne Zubiri egitasmoaren arduradunak.
Azaldu duenez, pandemiaren eraginez, egunotarako antolatuta zeuden ekintza batzuk bertan behera utzi behar izan dituzte, hala nola garagardo- eta turroi-tailerrak. “Ahal bada, garagardo-tailerra etorkizunean egiteko asmoa dugu. Bestalde, aurreko hilabeteetan ekintza batzuk egin ditugu: mendi-irteera, talo-tailerra eta Getxophotora joatea”.