Emakumeen Larruzko Pilotako III. Bizkaia Paleta Txapelketa apirilaren 10ean hasiko da, hamabi palistarekin. Guztira lau jardunaldi izango ditu txapelketak; lehenengoa Larrabetzuko pilotalekuan izango da eta Bizkaia frontoian jokatuko dira hurrengo partidak, apirilaren 17an eta 24an. Finala 30ean jokatuko da.
Lorea Bilbaok, Bizkaiko Euskara, Kultura eta Kirol diputatuak, txapelketaren hirugarren edizioaren xehetasunak eman ditu eta, horrekin batera, Aldundiak emakumeen kirolaren aldeko apustua indartu du beste urte batez. Txapelketan parte hartuko duten palistetako batzuk ere izan dira aurkezpenean.
Bizkaia frontoiko Facebook bidez jarraitu ahal izango da Emakumeen Larruzko Pilotako III Bizkaia Paleta Txapelketa, oraindik ez baitago baimenduta gaur egungo kirol ekitaldietan jendeak ikusle moduan parte hartzea. Gainera EITBk finala eskainiko du.
Txapelketa apirilaren 10ean hasiko da Larrabetzuko pilotalekuan 17:00etan, bi partidarekin. Lehenengo partida Nagore Martinek eta Leire Etxanizek Uxue Agirresarobe eta Maialen Landajoren aurka jokatuko dute, eta bigarrena, Leire Galdosek eta Maider Mendizabalek Udane Iturbe eta Olatz Zulaikaren aurka.
Apirilaren 17an izango da txapelketako bigarren jardunaldia, 17:00etan, Bizkaia frontoian, bi partidarekin. Lehenengo partida Amaia Irazustabarrenak eta Mirian Arrrillagak Uxue Agirresarobe eta Maialen Landajoren aurka jokatuko dute, eta bigarrena, Miren Larrartek eta Itsaso Erasuk, Udane Iturbe eta Olatz Zulaikaren aurka.
Gainera, hirugarren jardunaldia apirilaren 24an jokatuko da Bizkaia frontoian, 17:00etan eta bi partidarekin. Lehen partida Nagore Martinek eta Leire Etxanizek jokatuko dute Amaia Irazustabarrena eta Mirian Arrrillagaren aurka. Hirugarren jardunaldiko bigarren partida Leire Galdosek eta Maider Mendizabalek Miren Larrarte eta Itsaso Erasuren aurka jokatuko dute. Finala apirilaren 30ean izango da Bizkaia frontoian.