Egitasmoa egingo da Nekazaritza, Arrantza eta Elikadura Ministerioaren Natura-Bideen Programaren harira, eta, hortaz, programaren onuradun izateko ezarritako baldintzetara ere egokitu beharko da. Aldundiak 2012ko plangintza-dokumentuan proposatu zuenez, trazadura Montañon (Bilbo) hasi, eta hiriburua eta Lezama lotzen zituen trenbidearen plataformatik igaroko da ia osorik. Plataforma hori ez da 1908tik erabiltzen eta 500 metroko luzerako tunel bat dauka, Txorierriko korridoreraino ailegatzen dena. Gune horretatik aurrera, ibilbidea Sondikako Bidekurtze auzoko bidetik doa, Santimami ingurutik jarraitzen du Loiun eta Zamudion zehar (Asua ibaiaren eskuinaldean), eta Txorierriko Mankomunitateak proiektatutako bizikleta-bideen ardatzarekin egiten du bat.
Aldundiak azaldutakoaren arabera, trazaduraren bidez lotu nahi dira Bilboko bizikleta-bideen sarea eta Txorierri-Mungialdea. Turismoaren eta naturaren arloetan erakargarritasun handiko ibilbidea izango da, eta, era berean, ondarearen eta memoria historikoaren zati nabarmen bat berreskuratzeko aukera ekarriko du. Horrezaz gainera, aisialdiko eta turismoko jarduerak egiteko ibilbidea izango da, Donejakue bidearen barruan. Bestalde, bide-tarteak Artebakarratik pasatuko den beste ibilbide batekin egingo du bat, eta Mungiaraino ailegatzen zen tren zaharraren trazadurarekin lotuko da; trazadura hori bizikletaz ibiltzeko bidea da gaur egun. Behin egitasmoa esleituz gero, sei hilabeteren buruan egin beharko da.