“LABIren neurri berriak izugarriak dira: azken hilabeteotan kostatu zaigu araudi berrira egokitzea eta orain ere denbora beharko dugu, baina pozik gaude. Gaur, eserlekuak jarri ditut barraren aurrean eta jendea harritu da. Apurka-apurka betiko erritmoa hartuko dugu”, adierazi du tabernariak. Bere esanetan, jendeak gorriak ikusi ditu, askok enplegu-espediente erregulazioak izan dituztelako, eta “hori gertatzen denean, ez diozu jateari uzten, tabernara joateari baizik”. Maite baikor agertu da, “gehienok txertoa hartu dugulako”. “Maskara luze jantzi beharko dugu, baina aurrera goaz eta lan egiteko gogoa dugu”.
Bezeroak ere pozik azaldu dira LABIk hartutako neurriekin. “Lehen ondo geunden, mahaietan eserita; eta hemendik aurrera ere ibiliko gara gustura, barran. Nik ez dut tabernan maskara kenduko eta, ahal izanez gero, kanpoan hartuko dut edaria. Hala ere, barran egon ahal izatea ere pozgarria da”, aipatu digu bezero batek.