Euskararen Egunari lotutako ekitaldiak Zamudion egin dira aurten: umeentzako zein helduentzako ikuskizunak, mendi-irteera eta kirol-erakustaldia, besteak beste. Gainera, gaur arratsaldean kale-animazioa egongo da Kantarelux taldearen eskutik. Hitzordua 19:30ean ipini dute Leizaola plazan. Bestalde, eta Darabilgu elkarteak antolatuta, eskolako umeek egindako argazkiek osatutako bideo mapping-a izango da 19:00etan, Larrabetzuko plazan.
Gaur, abenduak 3, Euskararen Nazioarteko Eguna da. Euskaldunok euskaraz bizi nahi dugula aldarrikatzeko eguna da, euskaraz sentitzeko, abesteko, sortzeko, lan egiteko, maitatzeko eta haserretzeko. Era berean, eguna da gogora ekartzeko oraindik lan handia dagoela esparru guztietan euskara erabat normalizatzeko eta helburu horri heltzeko urratsak egiteko eskatzen jarraitzeko. Izan ere, euskaraz urteko 365 egunetan bizi nahi dugu.