Eurite handiak izaten ari gara azken egunotan eta ibaien eta erreken emariek gora egin dute. Ondorioz, gainezka egin dute zenbait lekutan eta uholdeak eta arazoak eragin dituzte. Sondikan, esaterako, itxi dituzte Ibaiondo, Izarza eta Txorierriko korridoreko irteera eta eskatu dute Zangroizen kontu handiz ibiltzeko. Larrabetzuko Zubitalde auzoa ere urez bete da, eta Sarrikola ingurua. Zamudion, bestalde, hainbat bide itxi behar izan dituzte.
Besteak beste, hauek dira Zamudion zirkulaziorako itxi dituzten bideak: Zamudioren eta Larrondoren arteko errotondan, Ugaldeguren I poligonora doan bidea; Santimami parkearen ingurua; Lekunbiz auzotik Exane auzora doan bidea; eskolatik psikiatrikorako bidea; Torrelarragoitik errepide orokorrerako bidea. Errekalde Zamudioko futbol-zelaia ere hartu du urak, eta arazoak daude Asuako errotondan. Euskalmetek jakinarazi duenez, egoera zaila izango da bihar arte eta erreketatik eta ibaietatik aldentzeko gomendioa egin diete herritarrei, baita autoak urez bete daitezkeen lekuetatik kendu.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).