Eurite handiek arazoak sortu zituzten atzo Txorierrin. Errekek eta ibaiek gainezka egin zuten hainbat txokotan eta bideak eta errepideak itxi behar izan ziren. Urak hartu zituen, besteak beste, lokalak, garajeak eta futbol-zelaiak. Suhiltzaileek lan handia izan dute eta Bizkaian 42 jarduketa egin dituzte atzotik gaur goizeko 8ak arte. Esaterako, isolatuta geratu zen Loiuko baserri batera joan ziren etxekoak ondo zeudela baieztatzeko, eta txakurrak atera behar izan zituzten Loiuko txabola batetik. Zamudion eroritako zuhaitza kendu zuten errepidetik, eta auto bat ur-putzu batetik atera zuten Derion.
Bestalde, Lezamara ere joan ziren Aretxalde auzoko lokal batetik ura ateratzera, eta Deriora, urez beteta zeuden lokalak ikustatzera. Azken orduetan euri gutxiago bota du, egoera lasaiagoa da eta bideak zabaldu dira; hala ere, arratsaldean beste ur-fronte bat ailegatzea espero da eta horregatik adi egoteko deia egin du Segurtasun Sailak.