Aireportuan lan egiten duen sondikoztar bat kexatu denez, “orain, berriro hartu behar dugu autoa aireportura joateko, edo Derioraino edo Bilboraino joan eta autobusa bertan hartu. Erabiltzaile gutxi izanda, beste neurri batzuk hartu zitekeen, esaterako, maiztasuna gutxitzea, baina zerbitzua kentzea ez da bidezkoa”. Bestalde, Larrabetzutik irteteko ordutegiak ere aldatu dira: lanegunetan eta zapatuetan, orduero irteten da 6:30etik 21:30era; eta jaiegunetan, orduero, 07:35etik 21:35era.
Aireportura eta Parkera joateko autobus-zerbitzua bertan behera, Sondikan eta Larrondon
2021eko urtarrilean aldaketa egin zen Bizkaibuseko A2153 linean. Hari esker, Txorierriko herri guztiek zuzeneko lotura zuten aireportuarekin eta Bizkaiko Zientzia eta Teknologia Parkearekin. Hala ere, urtebete pasa ondoren, Bizkaiko Foru Aldundiak erabaki du Derio-Sondika-Derio tartea kentzea, “eskari txikia dagoelako”. Erabakiaren ondorioz, Larrondoko eta Sondikako geldialdiak bertan behera utzi dira. Haserrea dago zerbitzuaren erabiltzaileen artean.