Orotara 4,3 milioi euro ipini dira obra egiteko. Hori Bizkaiko Foru Aldundiarekin batera finantzatu da, Ur Partzuergoak erakundearekin duen hitzarmenaren baitan. Lanak 2018ko urtearen amaieran hasi ziren eta hiru fasetan egin dira: zuhaitzak kentzea eta egokitze-lanak, biltegi eta hodi berriak eraikitzea eta eremua birjartzea eta hobetzea. Izan ere, lursaila berreskuratu da herritarren aisialdirako: San Rokeko bidea birjarri eta handitu da; aparkaleku berriak ipini dira; haurrentzako jolastoki berria atondu da; zeudenak egokitzeaz gainera, oinezkoentzako pasaleku berriak jarri dira; argiteria hobetu da; eta landare inbaditzaileak kendu eta bertokoak landatu dira.
Inaugurazio-ekitaldian batu ziren hauek: Kepa Odriozola, Bilbao Bizkaia Ur Partzuergoko presidentea; Amaia Antxustegi, Iraunkortasuna eta Ingurune Naturala Zaintzeko foru-diputatua; Esther Apraiz, Derioko alkatea; Igotz López, Zamudioko alkatea; Xabier Zubiaur, Sondikako alkatea; eta Juan Mari Aburto, Bilboko alkatea.
Aurrekariak
Artxandako lehenengo biltegiak 400 metro kubikoko bolumena zuen, eta oso erregulatze-gaitasun txikia. Ur-lamina 254,00 metroko kotan zuen, eta hondokoa, 250, metroko kotan. Horren ondorioz, ponpaketak txarto funtzionatzen zuen, biltegia azkar husten zenez, egunean behin baino gehiagotan gelditzen zen eta. “Hain zuzen, 2007tik aurrera gora egin du eguneko batez besteko kontsumoa, eta egunean 1.200-1.600 metro kubikokoa izan da”, azaldu dute.
Arazoa konpontzeko, 2.000 metro kubikoko edukiera duen biltegi erregulatzaile berria eraikitzea proposatu zen, bi ontzitakoa. Azpiegitura berria aurrekoa zegoen lekuan kokatu da, Artxanda mendiaren gainaldean. “Helburuak dira etorkizuneko eskaera modu eraginkorrean asetzea, hornidura 24 orduan bermatzea, ponpaketaren funtzionamendua hobetzea eta gunea aisialdirako berreskuratzea. Gainera, biltegia lur azpian dagoenez, ez du ingurunean eraginik izango”.