Pandemiaren eragina arintzeko, Estatuak 94,7 milioi euro eman zion Bizkaiari eta Aldundiak horren erdia banatuko da herrien artean. Dirua udalerri bakoitzaren biztanle-kopuruaren arabera zabalduko da: 1.500 biztanlera arteko udalerri txikienek 100.000 euro jasoko dituzte eta Bilbok, 200.000 biztanle baino gehiago dituen udalerri bakarrak, 15 milioi. Txorierrin, Loiuk (1.500tik 3.000 biztanlera bitartean), 140.000 euro jasoko ditu, baita Larrabetzuk eta Lezamak ere; Sondikak eta Zamudiok (3.000tik 5.000 biztanlera bitartean), 230.000 euro; eta Deriok (5.000tik 7.500 biztanlera bitartean), 345.000 euro.
Unai Rementeria ahaldun nagusiak esan du Herriak Egiten ezohiko partida Bizkaia osoa hobetzeko funtsa dela. “Udalerri guztietan proiektu eraldatzaileak jarri nahi ditugu martxan, lurraldeko pertsona guztien bizi-kalitatea hobetzeko, bizi diren tokian bizi direla eta baldintza berdinetan. Eta hori bermatuta dago Herriak Egiten planarekin”. Gainera, Rementeriak aipatu du udalerrien diru-sarrerak handitu egingo direla. Izan ere, Udalkutxa funtsak likidazio positiboa izan du, 2021eko urrian aurreratu ziren aurreikuspenak hobetu egin baitira. Hau da, 80 milioi euro gehiago lortu dira.