Aldundiak BI-3741 eta BI-631 errepideak lotu zituen Santo Domingon, 0,5 milioi euroren truke. Halaber, bost milioi gastatuko ditu BI-631 errepidea egokitzeko, Derioko Galbarriatu auzoan. Lanak ez dira oraindik bukatu. Eta azkenik, Asua aldeko BI-735 errepidea urpean ez gelditzeko lanak laster izapidetuko dira. Horiek 0,7 milioi euroko aurrekontua izango dute. Guztira, planaren barruan, Aldundiak sei milioi euro baino gehiago gastatuko ditu Txorierriko bide-sarea hobetzeko. Txorierrikoak alde batera utzita, hainbat lekutan ere egin dira hobetze-lanak: Gurutzetako ospitalean, Rontegi zubian, Gordexolan, Elorrion, Zornotzan, Leioan...
Bidesarea planak helburu bikoitza du: batetik, bide-segurtasuna modernizatzea; eta bestetik, errepide-loturen bidez, eskualdearen eta udalerrien lehiakortasun hobetzea. Imanol Pradalesek zehaztu duenez, 2019tik 2023ra bitartean 33 jarduketa planifikatu dira: horietatik zortzi amaitu dira; 10 martxan daude; eta 15 izapidetzen dabiltza. Guztira, 129 milioi euroko inbertsioa egin da Bidesarea planaren barruan azken lau urteotan. Eta Bidesarea jarri zenetik, 240 milioi euro inbertitu dira.