Arabako, Bizkaiko eta Gipuzkoako 7 eta 13 urte bitarteko 3.973 haurrek hartuko dute parte aurten udalekuetan. Udalekuak uztailaren 1etik 29ra bitartean egingo dira, astebeteko txandetan banatuta. Txanda bakoitzak 135 euro balio izango du, hobaririk gabe. Diru-sarrerak Bermatzeko Errenta edota Bizitzeko Gutxieneko Diru-sarrera jasotzen duten familiei % 85eko hobaria emango zaie, eta 20,25 euroko partaidetza-kuota ordainduko zaie. Era berean, familia ugarietako kideek % 30koa aurreztuko dute eta 94,50 euro ordaindu beharko dute. Plazen % 5, 63 ume, mendetasun aitortua duten pertsonengana bideratuko dira.
Bizkaian, Gorliz, Lapurreketa (Dima), Lurraska (Ajangiz), Zugaztieta (Trapagaran), Meakaur (Morga) eta Legasako (Bertiz-Arana) aterpetxeetan egingo dira udalekuak; Gipuzkoan, Orion, Zarautzen eta Hondarribian; Araban, Barrian, Zuhatzan eta Espejon; eta Nafarroan, Arantzan, Bertizen eta Igantzin. Herritar bakoitzak bere lurraldean emango du izena, baina edozein udalekutan parte hartzeko aukera izango du.
Umeek hainbat ekintza egingo dituzte udalekuetan: museoak bisitatu, txalaparta, birziklatze-tailerrak, mitologiari buruzko gaualdiak, gynkanak, mendi-ibiliak, eskalada, rapela, tirolina, arku-tiroa, paintballa, arborismoa, orientazio-jolasak, laser tag, segway-a, mendiko bizikletako jaitsiera, arrauna, piragua, kanoi-jaitsiera, pedaloia, optimist, wind surfa, disc golfa edo pilota, multiabentura, herri kirolak (trontza, artaburuak, zakulariak, txingak, sokatira), ferrata bideak, baratzeko jarduerak, animaliekin egindako jarduerak eta elikadurari buruzko tailerrak, besteak beste. Eta inguruko geologia, flora eta fauna ezagutzeko jarduerak ere egingo dira.
Martxoaren 22tik aurrera, erregistratutako eskabideen zerrenda argitaratuko da webgunean, eskatzaileek zerrenda horretan sartu direla egiaztatu ahal izan dezaten. Zerrenda horretan agertzen ez bada, erreklamazioa aurkezteko epea hamar egun naturalekoa izango da (martxoaren 23tik apirilaren 1era). Notario aurreko zozketa publikoa apirilaren 28an egingo da, 10:00etan.
Informazioa:
944063360