Txorierriko taldea Arrosa herria batu zen eta handik Larla mendira abiatu ziren. Guztira 3,2 kilometroko ibilbidea egin zuten gailurrera heltzeko. “Mendi puntan, adierazpena irakurri zen eta kanta bi abestu: Gure Esku ekimenarena eta Mikel Laboaren Txoria txori. Giro ederra egon zen, patxadaz hartu genituen bai igoera bai jaitsiera. Ibilbidea ez zen zaila, baina jaitsieran kontuz ibili ginen gaua zelako; dena dela, antolatzaileok balizak jarri genituen bidea argiztatzeko. Bitxikeria bada ere, Erramun Martikorena Baigorriko abeslaria gurekin izan zen”, esan dute Gure Esku ekimenaren Txorierriko kideek.
Ekintza Pirinioetako Bidea/Via Pirinenca egitasmoaren baitan egingo da eta antolatzaileak hauek dira: Gure Esku, ANC Assemblea Nacional Catalana eta FEEC Federació d’Entitats Excursionistes de Catalunya. Omnium Cultural eta Artistes de la República erakundeek lagundutako egitasmoa da. Taldeak lehenengo aldiz ibili dira elkarlanean, baina aipatu dutenez, epe luzera ere elkarrekin arituko dira. Pirinioetako saioa “ludikoa” da, baita politikoa ere, noski. “Aldarrikapena egin dugu. Eskozian beste erreferendum bat egingo dute datorren urterako eta guk urrian eztabaida piztu nahi dugu Euskal Herrian eta Katalunian”.
Arrakastatsua
Guztira, milaka lagunek hartu zuten parte ekimenean. Antolatzaileek saio politikoa egin zuten Guils-Fontanera eski-estazioan, Gironan. “Saioa oso arrakastatsua izan da. Euskaldunok eta katalanek bat egin dugu eta horri esker, Pirinioak argiztatzeko gauza izan gara; etorkizunean, elkarrekin jarraituz gero, gure proiektu komunek aurrera egingo dute. Mendian ikusi dugun argi bakoitza izar bat izan da, askatasunera eta gure herrien subiranotasunera bidea argitzen duena, alegia”, esan zuen Amaiur Alvarez Gure Esku ekimenaren bozeramaileak.
Era berean, Dolors Feliu ANC elkartearen presidenteak ere hartu zuen hitza ekitaldian. “Europako saio artistiko-politikorik handiena izan da eta betiko gogoratuko da. Katalunian eta Euskal Herrian subiranotasun osoa nahi dugu, hau da, gure etorkizuna askatasunez erabaki eta eraiki nahi dugu. Herrien gogo demokratikoa errespetatzea gustatuko litzaidake, mugak bozen bidez erabaki behar direlako; ez inposaketaren, bortizkeriaren eta gerren bidez”, adierazi du.
