Jose Maria Iruarrizaga Ogasun eta Finantzetako foru diputatua eta Iñaki Alonso Ogasuneko zuzendaria pozik agertu dira kanpainarekin. Beren esanetan, emaitza positiboak 2021eko ekitaldiaren bilakaera ekonomikoa islatzen du Bizkaian, hau da, iaz, jarduera ekonomikoa eta enplegua berreskuratu ziren eta dirua aurrezteari esker, ondare-irabaziak nabarmen handitu ziren. Gainera, Bizkaiko errenta-kanpaina bera azpimarratu dute, zergadun guztiek aitorpen-zirriborro bat eta hori izapidetzeko hiru bide izan dituztelako: online, telefonoz eta bulegoetan. % 80k Internet bidez egin dute; % 15ek, telefonoz; eta gainerako % 5ek, aurrez aurre.
Aldundiak arreta zerbitzua ere jarri du zergadunen eskura. Horrek 515.326 kontsulta jaso ditu: % 92,5, telefonoz; eta % 7,5, aurrez aurre. Arreta pertsonalizatua 437 pertsonak jaso dute; 126k aurrez aurreko zerbitzuan hamar foru bulegotan eta 311k telefono-zerbitzuan. Erabiltzaileak pozik agertu dira zerbitzuarekin, Foru Ogasunak zabaldutako arreta-zerbitzuari 10 puntutik 8,5eko nota eman diotelako. Orotara, 11.583 pertsonak hartu dute parte errenta-kanpainako zerbitzuarekiko gogobetetzeari buruzko inkestan.