Lezaman, udalak, Berdintasun Kontseiluak eta Moreak talde feministak Hilario Astorki plazan, udaletxearen aurrean, elkarretaratze isila egiteko deia egin dute. “Beste erailketa matxista bat, amorruz utzi gaituena. Nazkatuta gaude! Aski da! Noiz arte? Azken erailketa matxista gogor salatzera aterako gara kalera. Gure bizitzak jokoan baitaude”, adierazi du Moreak taldeak gizarte-sareetan. Zamudion, udalak deituta, herritarrak udaletxearen aurrean batuko dira, minutu bateko isilunea egiteko. Halaber, Derioko Udalak bat egin du Euskadiko Udalen Elkarteak (EUDEL) egin duen gaitzespen-adierazpenarekin eta, horren haritik, puntu lila bat jarrita du udaletxeko fatxadan. Gainera “elkartasuna” adierazi die biktimaren senideei eta lagunei. Egunean zehar deialdi gehiago egin daitezke.
Elkarretaratzeak antolatu dira Txorierriko herri batzuetan gaur, azken hilketa matxista arbuiatzeko
Astelehenean, irailak 26, gizon batek bere bikotekidea, Maria Luisa Larrañaga, ustez hil zuen, Benidormen. Andreak 67 urte zituen eta Soraluzekoa zen, baina Elgoibarren bizi zen senarrarekin (73 urte). Polizia Nazionalaren arabera, erailketaren ostean, gizonak bere buruaz beste egin zuen: autoa kamioi baten kontra jo zuen. Hilketa salatzeko, udalek eta elkarteek elkarretaratzeetara deitu dute gaurko, 19:00etarako, Zamudion eta Lezaman.