Txorierri ere Euskaraldiaren olatura igo da eta gure kale eta auzoak Euskaraldiz jantziko ditu datorren azaroaren 18tik abenduaren 2ra.
Horretarako, Mankomunitatean, aurreko edizioetan bezala, Txorierrin Euskaraldia dinamizatuko duen koordinatzaile bat hasita dago lanean, Txorierriko sei herri-batzordeak koordinatzen. Orain arte, aurreko edizioetako balorazioa aztertzen eta aurtengo ediziorako gidalerro nagusiak zehazten ibili dira: zein entitatetara jo, nola jo, zer azaldu… Lan aberasgarria, zalantza izpirik gabe, euskara plazaren erdigunera atera nahi duen ororentzat. Udako oporraldiaren ostean, batzordeak martxan jarriko dira, berriz ere, Txorierriko herrietan. Adi, beraz, deialdietara! Herritar guztien laguntza eta gertutasuna behar izango baita Euskaraldiaren tentakuluak ertz guztietara irits daitezen.
Euskaraldiaren bigarren edizioan (2020) bezalaxe, hirugarren honetan ere entitateek toki berezia izango dute. Ariguneen bidez, elkarte, enpresa, eta bestelakoek arnasguneak sortzeko aukera izango dute euren arloan. Ahobizi eta belarriprest rolak hartuta, ariketa, herritarren lanpostuetara, aisialdi-ekintzetara eta abarretara zabaltzeko aukera paregabea dugu ariguneena. Zabalik dute dagoeneko entitateek Euskaraldian izena emateko aukera!
Berrikuntza gisara, Txorierriko gazteak erakarri nahi ditugu batzorde propioa sortu dezaten eta Euskaraldian toki aktiboa har dezaten. Euskarak etorkizuna izango badu, ezinbestekoa izango da gazteak ere euskararen aldeko ekimenetako antolatzaile eta subjektu ekintzaile izatea.
Gogoan izan, irailaren 28tik aurrera, norbanakoek Euskaraldian izena emateko aukera irekiko dela. Aurten, aurreko edizioetan izena emanda egon diren herritarrek parte hartzea konfirmatu baino ez dute egin beharko. Animatu zaitezte!
Txorierriko dinamizatzailea prest dago entitate zein norbanako orori laguntza eskaintzeko, Euskaraldi aurreko prozesua samurtzeko eta Euskaraldian zehar sor litezkeen zalantzei aurre egiten laguntzeko. Hainbat bidetatik jo dezake herritarrak dinamizatzailearen laguntza bila: Instagram bidez (@txorierrikoeuskaraldia), Facebook bidez (Euskaraldia Txorierri), posta elektronikoz (txorierri.euskaraldia@gmail.com) eta telefonoz (688634485).
Orain ez daukagu aitzakiarik, erabili daigun gure hizkuntza Txorierriko txoko guztietan. Zu behar zaitugu horretarako! Hitzez ekiteko garaia da!