“Pandemia atzean utzi nahi dugu eta kaleak berreskuratu; jendeak Euskaraldia datorrela jakin dezala, lehenengo edizioaren ilusioa berreskuratu”, esan du Aitziber Argiarro Txorierriko Euskaraldiaren dinamizatzaileak. “Aurten Txorierrin gazteen batzordea sortu dugu lehendabiziko aldiz, gazteek espazio propioa izateko”.
Ekitaldian, hainbat euskaltzale batu dira eta herri bakoitzeko batzordekide bat aritu da eszenatokiaren gainean: Txaro Martin (Derio), Patxi Gaztelumendi (Larrabetzu), Iñaki Lekerika (Lezama), Gabriel Etxebarria (Zamudio), Alaitz Zabala (Sondika) eta Paule España (Loiu). Guztiek Euskaraldian parte hartzeko eta euskaraz aritzeko gonbita egin dute. Lekerikak, esate baterako, azpimarratu du euskarak nortasuna ematen digula; Zabalak, halaber, euskara gure ondarea dela eta zaindu behar dugula.
Gainera, euskal dantza-taldeek Euskaraldiaren abestia aurkeztu dute, Esazu hitz bat. Musika Xabier Zabalak egin du eta Andoni Egaña bertsolariak hitzak jarri dizkio. Saioa biribiltzeko, bideoa eman da eta Ane Lindanek bakarrizketa umoretsua egin du.
Informazioa:
txorierri.euskaraldia@gmail.com
688 634 485 (Aitziber)