Txapelketa urrian hasi zen eta aurreko asteotan kanporaketak jokatu dira. Hamalau urte baino ez ditu, baina Aiala Uriarte aurrerapauso sendoak egiten dabil pilotan. Izan ere, iaz Bizkaia Cup Txapelketa irabazi zuen goxo kategorian, baita Emakume Master Cup Binakako Txapelketa ere. Atzoko finalean, lehenengo tantoa Anituak lortu zuen, baina handik aurrera, sondikoztarrak ez zion arerioari irabazteko aukerarik eman. Anitua ez da pilotari makala, urrian Hiru Hiriburu Binakako txapelketaren finalista izan baitzen.
Egun eta leku berean, beste kategorietako finalak ere jokatu ziren Gordexolan eta giro ederra egon zen frontoian. Goxo mailei dagokienez, Uxue Lopez Okarizek 18 eta 4 irabazi zion Onintza Galdosi gazte kategorian; eta Marie Goyenetche senpertarrak, 18 eta 10, Nagore Aramendi azpeitiarrari, senior kategorian. Beatriz Atienza Gordexolako Berdintasuneko zinegotziak eta Jose Maria San Pedrok, Kiroletakoak, jantzi zizkieten txapelak garaileei.