Ekitaldian, garai hartan desanexioaren alde lan egin zuten hainbat pertsona ekarri ziren gogora. Ekitaldian hauek hartu zuten parte: Esther Apraiz, Igotz López, Xabier Zubiaur eta Josu Andoni Begoña Derioko, Zamudioko, Sondikako eta Loiuko alkateak, hurrenez hurren. Gainera, hauek ere bertan izan ziren: Juan Mari Aburto eta Aitziber Oliban, Bilboko eta Erandioko alkateak, hurrenez hurren, eta Elixabete Etxanobe Herri Administraziorako eta Erakunde Harremanetarako foru diputatua. Guztiak San Roqueko baselizan batu ziren, elkarrekin argazki bat egiteko.
Txorierriko alkateek erakundeen arteko lankidetza azpimarratu zuten. “Desanexioa lortu zen, pertsona eta erakunde askok elkar ulertzea lortu zutelako; izan ere, hori da herritarren arazoak konpontzeko oinarria”, esan zuen Xabier Zubiaurrek. “Pertsona batzuek gaur hemen gauden herrien nortasuna ulertzearen aldeko apustua egin zuten”, gaineratu zuen Esther Apraizek.
Oroitzapena
Desanexioa gogorarazteko, panelak egin dira. Horietan garai hartan gertatutakoa eta Bilboko Udalak udal berriei eman zizkien tasazioa eta baliabideak jaso dira. Bestetik, Erandioko Jon Alberdi Bastida eskultoreak egindako lan bana jaso zuten Bilboko Udalak eta Bizkaiko Foru Aldundiak. Halaber, deialdia egin duten udalek oroitzapenezko eskultura ere eskatu dute, eta hori herrietan erakutsiko dute. Udalek desanexioa ospatzen jarraituko dute eta zenbait ekintza egingo dituzte 2023an.