Gaur goizean, Ideia Ekintzaileen Bideoen 2022ko Lehiaketaren sariak banatu ditu EGAZ Txorierrik. Lehiaketa OGAGA proiektuak irabazi du: paperontzi adimendu bat, gai dena poltsa beteta dagoen hautemateko, poltsa itxi eta bere ordez beste bat jarri. Gainera, proposamenak segurtasuna hartu du kontuan, eta umeek eta animaliek ezin dute ireki. Ideiaren garatzaileak dira Gabriel Alzueta, Ander López, Gabriel Roman eta Anaitz Zabala, eta saritzat 500 euroko txekea jaso dute teknologian gastatzeko.
Bestalde, bigarren saria INFOBEACH proiektuak irabazi du, hondartzeko informazioa kontsultatzeko aplikazio mugikorra dena; eta hirugarrena, EKOLATUA proiektuak, gizartea klima-aldaketarekiko eta garapen iraunkorrarekiko sentikor bihurtzea helburu duena. Proiektu horiek 350 euroko txekea eta 150 euroko txekea jaso dute hurrenez hurren, teknologian gastatzeko. Lehiaketan 39 lagunek hartu dute parte eta guztira 12 ekintzailetza-proiektu aurkeztu dituzte. Txorierriko gazteak eta Politeknika Ikastegiko ikasleak izan dira parte-hartzaileak.
Lehiaketa Txorierriko Zerbitzu Mankomunitateak egin du eta Bizkaiko Foru Aldundiak finantzatu du Gaztedi programaren baitan. Helburua da Txorierriko 16 urtetik 29 urtera bitarteko gazteen artean ekintzailetza sustatzea.
Txorierriko albiste garrantzitsuak eta azken ordukoak jaso gura dituzu Whatsapp bitartez?
WHATSAPP: Bidali ALTA hitza 747 406 561 telefono zenbakira.
Izan zaitez berriemale ere. Bidali zure argazkiak, bideoak eta berriak.
Hilero lagun birentzako bazkaria zozkatuko dugu alta hartzen dutenen artean (Baserri Antzokian).
