Proiektuari Athletic Clubek eta Bizkaiko Futbol Federazioak adierazi diote babesa. Aldundiak lankidetza hitzarmena sinatu du klub zuri-gorriarekin. Era berean, 240.000 euro inbertituko ditu Athleticek lurraldeko emakumezkoen klubak prestatzeko. Athletic Clubak Bizkaiko emakumezkoen oinarrizko futbolaren egitura landu nahi du, eta horretarako, bere esperientzia eta ezagutzak beheko mailetako klubekin partekatuko ditu. Guztira, emakumezkoen 50 klub daude Bizkaian, eta horietako 37 eskola kirol mailan sartzen dira lehian. Gaur egun, 30 bat kirol-erakunde atxiki dira dagoeneko ekimenera, baina sustatzaileek gainerakoak ere erakarri nahi dituzte.
Lorea Bilbao Ibarra Euskara, Kultura eta Kirol diputatuak ekimena aurkeztu zuen atzo. Berarekin batera hauek aritu ziren: Xabi Arrieta, emakumezkoen Athletic Clubaren zuzendaria; Lourdes Zorrozua, Bizkaiko Futbol Federazioko zuzendaritzako kidea; eta Gari Fullaondo, proiektuaren zuzendaria. “Proiektu aitzindaria da, tresna bat Bizkaiko emakumezkoen futbola bere kabuz garatu ahal dadin. Emakume guztientzako eta guztiekin. Baloia da batzen gaituen elementua, eta ekimen honen bidez gure artean partekatu nahi dugu, batak besteari pasatu”, esan zuen Bilbaok.