Lezamako eskolak bihar egingo du jaia eta egitarau oparoa prestatu du horretarako. 11:00etan, txupinazoa izango da eta ostean, goizean, aurpegiak margotzeko tailerrak eta puzgarriak egingo dira. 13:00etan, Kurutze dantza taldeak eta Ekidazu abesbatzak agurra egingo dute. Ordubete beranduago, elkarte biek luntxa hartuko dute seigarren mailako ikasleekin batera. 14:00etan, gainerako umeek hartuko dute bazkaria; eta 15:00etan, gurasoen txanda izango da. Arratsalderako, puzgarriak, jolasak eta ur-gerra antolatu dira, baita beste ekintza batzuk ere: 17:00etan, MTB zirkuituko sari-banaketa; 17:10ean, bingoa; 18:30ean, dj Suits&Sound; eta 19:00etan, askaria. Jaia 21:30ean bukatuko da.
Larrabetzun ere bihar egingo dute jaia. Diana eta kalejira 10:00etan izango dira, txistulariek girotuta. 10:30ean, familien lasterketa solidarioa izango da eta, horretarako, ordu erdi lehenago izena eman behar da frontoian. 11:30ean, Bizkargi dantza taldeak erakustaldia egingo du eskolako aterpean. Ostean zenbait ekintza etorriko dira: 12:30ean, zuhaitzak landatuko dira eskolan; 12:30etik 14:30era bitartean, azoka txikia irekiko da; eta 13:00etan, erraldoiak eta buruhandiak ikusteko aukera egongo da. Bazkaria 13:30ean zerbitzatuko zaie umeei; eta 15:30ean, gurasoei. Bazkalostekoa seigarren mailako ikasleen agurrak girotuko du 16:00etan; eta arratsaldea, jolasek, puzgarriek, zezen mekanikoak eta apar-jaiak. 19:00etatik aurrera, dantzatzeko ordua izango da. Hurrengo egunean, 11:00etatik aurrera, herria garbitzeko deialdia egin dute antolatzaileek.
Derioko eta Sondikako eskolek ekainaren 21ean, eguaztenean, egingo dute jaia. Derion, 16:00etatik 19:00etara bitartean egingo dute eta tarte horretan zenbait ekintza egingo dira: Lehen Hezkuntzaren 6. mailako ikasleek agurra, ludoteka txikienentzat, apar-jaia, puxika-gerra, diskofesta eta aurpegiak margotzeko tailerrak. Bestetik, Sondikan, 15:00etatik 17:00etara eskolako patioan puzgarriak jarriko dira; eta 17:00etatik 19:00etara San Joan landan diskofesta egongo da.